TIGO YAZINDUA MASHINE ZA 'TIGOMATIC'

KUTOA HUDUMA SAA 24

Mtaalam wa Huduma kwa wateja kutoka Tigo, Henry Mboya(kulia) akionesha jinsi mashine maalumu ya ‘TigoMatic’ inavyoweza kutumika mara baada ya uzinduzi wa mashine hizo leo jijini Dar es Salaam. Pembeni ni Mkuu wa Idara ya Huduma kwa wateja, Zaem Khan.

Dar es Salaam, Desemba 24, 2013. Tigo Tanzania leo imetangaza uzinduzi wa mashine maalum zinazowawezesha wateja wake kupata huduma za kutuma na kupokea fedha, kulipia bili za huduma mbali mbali, kuongeza salio na kupata laini mpya za simu zinazofanya kazi masaa ishirini na nne kwa siku.
Akizungumza na Waandishi wa Habari katika tafrija ya uzinduzi wake leo jijini Dar es Salaam, Mkurugenzi Mkuu wa Tigo Bw. Diego Gutierrez alisema kwamba mashine hizo zinazoitwa ‘TigoMatic’ zitawahudumia wateja aina wote, ikiwemo wateja wa malipo ya kabla na wateja wa malipo ya baadaye, zikifanya kazi masaa ishirini na nne kwa huduma zitolewazo na kampuni hiyo ya simu.

“Hakutakuwa na ulazima tena kwa wateja wetu kukaa kwenye foleni kwa ajili ya kupata huduma zetu kutoka kwenye matawi yetu na sehemu zetu mbali mbali za mauzo kwa sababu mashine hizi zitatoa msaada wa mteja kujihudumia mwenyewe,” alisema Bw. Gutierrez.

Alisema kwamba wateja wa Tigo hawatakuwa na ulazima wa kujisajili upya kwa ajili ya kutumia mashine hizo.

Akielezea jinsi mashine hizo zinavyofanya kazi, Bw. Gutierrez alisema kwamba Tigomatic ni mashine ambazo mteja anaweza akajihudumia yeye mwenyewe kama vile huduma za ATM ambapo mtu anaweza akafanya miamala tofauti tofauti bila kuhitaji kumtegemea mfanyakazi wa benki. 

Tigo ikiwa na wateja zaidi ya milioni 6 nchi nzima, Bw. Gutierrez amesema kwamba mashine hizo zitatolewa kwa awamu kuanzia Dar es Salaam siku ya leo (24 Desemba) kuelekea mikoa mengine mwakani. Mashine hizo zitawekwa katika sehemu za mikusanyiko mikubwa ya watu kwa mfano kwenye maduka makubwa, stendi za mabasi, barabarani, viwanja vya michezo na mahospitalini.

Mkurugenzi Mkuu wa Tigo,Diego Gutierrez akizungumza na waandishi wa habari wakati wa uzinduzi wa mashine maalumu ya ‘TigoMatic’ leo jijini Dar es Salaam. Kushoto kwake ni Meneja Mawasiliano wa Tigo, John Wanyancha na Mkuu wa Idara ya Huduma kwa wateja, Zaem Khan.

Mtaalam wa Huduma kwa wateja kutoka Tigo, Henry Mboya(kulia) akifafanua jinsi mashine maalumu ya ‘TigoMatic’ inavyoweza kutumika mara baada ya uzinduzi wa mashine hizo leo jijini Dar es Salaam. Pembeni ni Mkuu wa Idara ya Huduma kwa wateja, Zaem Khan.